US Venezuela War: అగ్ర‌రాజ్యం అమెరికా మొన్న రాత్రి వెనెజ్వెలా దేశంపై మెరుపు దాడుల‌తో విరుచుకుప‌డిన సంగ‌తి తెలిసిందే. వెన్వెజ్వెలా నుంచి మాద‌క‌ద్ర‌వ్యాల‌ను అక్ర‌మంగా అమెరికాకు త‌ర‌లించి త‌మ దేశ ప్రతిష్ఠ‌ను మంట‌గ‌ల్పుతున్నారంటూ డొనాల్డ్ ట్రంప్ ఎప్ప‌టి నుంచో ఆరోపణలు చేస్తూ వ‌చ్చారు. వెనజ్వెలాలో ఎక్కువ‌గా కొకైన్ త‌యారుచేసి అమెరికాకు అక్ర‌మంగా త‌ర‌లిస్తున్నారు. ఇది కేవ‌లం డ్ర‌గ్స్ ముఠాకు సాధ్యం కాద‌ని.. క‌చ్చితంగా వెనెజ్వెలా అధ్య‌క్షుడు నికోలాస్ మ‌డురో వెన‌కుండి న‌డిపిస్తున్నాడ‌ని ట్రంప్ ఆరోపణలు చేసారు.
నేనా.. నాకేం అవ‌స‌రం. ట్రంప్ అబ‌ద్ధాలు చెప్తున్నాడు అంటూ మ‌డురో ఎప్ప‌టిక‌ప్పుడు అమెరికా ఆరోప‌ణ‌లను తోసిపుచ్చుతూ వ‌చ్చారు. కానీ మాద‌క‌ద్ర‌వ్యాల అక్ర‌మ ర‌వాణా మాత్రం ఆగింది లేదు. ఇక పెద్ద‌న్న‌కు కోపం వ‌చ్చింది. మాట‌ల‌తో చెప్తే వినేలా లేడ‌ని.. ఆగ‌స్ట్ నుంచి ప‌క్కా ప్లానింగ్‌తో మొన్న రాత్రి వెనెజ్వెలాలోని రాజ‌ధాని క్యార‌కాస్‌పై మిలిట‌రీ ద్వారా మెరుపు దాడులు చేయించాడు. కేవ‌లం 30 నిమిషాలు.. 30 నిమిషాల్లోనే మ‌డురోను అదుపులోకి తీసుకుని న్యూయార్క్‌కు ర‌ప్పించాడు.
ఈ మిష‌న్‌కు ట్రంప్ పెట్టిన పేరు అబ్‌సొల్యూట్ రిసాల్వ్. మ‌డురో ఎప్పుడు ఎక్క‌డికి వెళ్తున్నాడు.. ఎవ‌రితో మాట్లాడుతున్నాడు.. ఏం చేస్తున్నాడు.. ఈ విష‌యాల‌ను మినిట్ టు మినిట్ అమెరిక‌న్ ఇంటెలిజెన్స్ ఏజెన్సీ తెలుసుకుంటూనే ఉంది. మ‌డురోను త‌న నివాసం నుంచి ఎలా ప‌ట్టుకురావాలో ట్రంప్ ప్లానింగ్ వేయించారు. స‌రిగ్గా సినిమాల్లో చూపించిన‌ట్లు మ‌డురో ఉండే నివాసాన్ని బ్లూ ప్రింట్ త‌యారుచేయించి ఎక్క‌డి నుంచి ఎటాక్ చేయాలి.. ఎక్క‌డి నుంచి అదుపులోకి తీసుకోవాలో రిహార్స‌ల్స్ చేయించారు.
అనుకున్న స‌మ‌యానికి ట్రంప్ అనుమ‌తితో మెల్లిగా నేవీ, వైమానిక శాఖ‌ను వెనెజ్వెలాలో దించారు. రాడార్ నుంచి త‌ప్పించుకునేందుకు స‌ముద్రంపై అత్యంత త‌క్కువ ఎత్తులో హెలికాప్ట‌ర్ల‌ను న‌డిపారు. దాదాపు 150 అమెరిక‌న్ ఎయిర్‌క్రాఫ్ట్‌ల‌ను వెనెజ్వెలా డిఫెన్స్ ఆర్మీకి తెలీకుండా క‌లిపేసారు. డెల్టా ఫోర్స్ నుంచి కీల‌క ఫోర్సెస్‌ను రంగంలోకి దించారు. స‌మ‌యం చూసి మిలిట‌రీ దాడులు జ‌రిపింది. ఆ స‌మ‌యంలో మ‌డురో, త‌న భార్య సిలియా మిలిట‌రీ బేస్‌లో ఉన్నారు. ఇలాంటి దాడులు జ‌రిగితే త‌ప్పించుకునేందుకు మ‌డురో స్టీల్ గేట్ల‌ను తయారుచేయించుకున్నాడు. ఒక‌వేళ ఆ గేటు లోప‌లికి వెళ్లినా దానిని తున‌క‌లుగా చేసి మ‌రీ చొచ్చుకెళ్లేలా అమెరిక‌న్ ఆర్మీ ప్లాన్ సిద్ధం చేసింది. కానీ ఆ అవ‌స‌రం రాకుండానే మ‌డురో దొరికిపోయాడు.
ప్ర‌స్తుతానికి మ‌డురో న్యూయార్క్‌లో ఉన్నారు. అత‌నిపై క‌ఠిన కేసులు న‌మోదు చేసి కోర్టుకు త‌ర‌లించే అవ‌కాశం ఉంది. మ‌డురో భార్య‌ను సుర‌క్షిత‌మైన ప్రాంతంలో ఉంచారు. ఈ మెరుపు దాడుల్లో ప‌లువురు అమెరిక‌న్ మిలిట‌రీ ఆర్మీకి స్వ‌ల్ప గాయాల‌య్యాయి కానీ ప్రాణ న‌ష్టం జ‌ర‌గ‌లేదు.