Money Saving Tips సాల‌రీ ప‌డింది. రెంట్ క‌ట్టేసాం. EMI క‌ట్టేసాం. మ‌ళ్లీ వచ్చే నెల‌లో ప‌డే సాల‌రీ కోసం ఎదురుచూడాలి. ఇంతేగా దాదాపు అంద‌రి ప‌రిస్థితి?

ఈ ఖ‌ర్చుల నుంచి ఎటూ త‌ప్పించుకోలేం. కనీసం ఇంప‌ల్సివ్ షాపింగ్ నుంచైనా త‌ప్పించుకునేందుకు య‌త్నించాలి. అప్పుడే నెల పూర్త‌య్యే స‌రికి క‌నీసం ఎంతో కొంత‌ అయినా దాచుకోగ‌లం. అదెలా సాధ్యం?

మీకు ఒక విష‌యం తెలుసా? ఎంత కాద‌న్నా మీరు ప్ర‌ధాన బిల్లుల‌పై ఖ‌ర్చు పెట్టేదాని కంటే ఎక్కువ‌గా ఇంప‌ల్సివ్ షాపింగ్ మీద ఖ‌ర్చుపెడుతుంటారు.

కావాలంటే ఒక‌సారి ప‌రిశీలించుకోండి. ఒక రోజు మొత్తంలో ఏం కొన్నారో అన్నీ ఒక లిస్ట్ రాసి పెట్టుకోండి. అది ఎంత చిన్న ఖ‌ర్చైనా స‌రే. రాసుకోండి. అప్పుడే తెలుస్తుంది. మ‌న డ‌బ్బులు మ‌న‌కు తెలీకుండానే మ‌నం ఎలా ఖ‌ర్చు చేసేస్తున్నామో.

మీకు ఏద‌న్నా కొనుక్కోవాల‌ని ఉంద‌నుకోండి. ఉదాహ‌ర‌ణ‌కు ఆడ‌వాళ్లైతే ఏద‌న్నా డ్రెస్ కానీ లిప్‌స్టిక్ కానీ ఏద‌న్నా జ్యువెల‌రీ కానీ.. అబ్బాయిలైతే వాచెస్, మొబైల్స్, వాలెట్స్ ఇలా ఏదైనా స‌రే.. కొనుక్కోవాల‌నిపిస్తే ఒక 24 గంట‌లు ఆగండి.

ఆ త‌ర్వాత దాదాపుగా అది కొనుక్కోవాల‌న్న ఆస‌క్తి కూడా ఉండ‌దు. ఒక‌వేళ 24 గంట‌ల త‌ర్వాత కూడా అది కొనుక్కోవాల‌నుకుంటే అప్పుడు తీసుకోండి.

సేవింగ్స్ చేసుకోమంటే ఎంజాయ్‌మెంట్‌ని ప‌క్క‌న పెట్ట‌మ‌ని కాదు. ఆ ఎంజాయ్‌మెంట్ మీరు చేసే సేవింగ్‌ని మించిపోకూడ‌దు అని మాత్రం గుర్తుపెట్టుకోండి.

కావాలంటే ఎంజాయ్‌మెంట్ ప‌ర్ప‌స్ కోసం కేవ‌లం ఇంత మాత్ర‌మే ఖర్చు చేయాల‌ని ఆ మొత్తాన్ని ప‌క్క‌న పెట్టుకోండి. ఆ మొత్తం దాట‌కుండా చూసుకోండి. ఒక వారం ఇలా ప్ర‌య‌త్నించి చూడండి.

సాల‌రీ అంతా వాడేసాక చివ‌ర్లో ఎంత మిగిలితే అంత సేవ్ చేసుకోవ‌డం కంటే సాల‌రీ రాగానే కొంత మొత్తాన్ని ఆటోమేటిక్‌గా సేవింగ్స్ ఖాతాలోకి డెబిట్ అయ్యేలా చూసుకోండి.

ఎన్ని చెప్పినా డ‌బ్బు ఖ‌ర్చు చేయ‌కుండా ఉండ‌లేక‌పోతున్నాం. ఎంత వ‌ద్దు అనుకున్నా ఏదో ఒక‌టి వ‌చ్చి ప‌డుతూనే ఉంది. డ‌బ్బు అలా వ‌చ్చిన‌ట్లే వ‌చ్చి ఆవిరైపోతోంది అనుకుంటే మాత్రం ఎవ‌డూ ఏమీ చేయ‌లేడు. ఏదైనా అనుభ‌వంతోనే క‌దా మ‌నం పాఠాలు నేర్చుకునేది.