Mohan Babu సీనియ‌ర్ న‌టుడు మంచు మోహ‌న్ బాబు తెలంగాణ హైకోర్టును ఆశ్ర‌యించారు. నిన్న జ‌ల్‌ప‌ల్లిలోని త‌న నివాసం వ‌ద్ద మీడియా వ‌ర్గాల‌పై దాడి చేయ‌డంతో ఆయ‌న‌పై కేసు న‌మోదైంది. దాంతో ఈరోజు మోహ‌న్ బాబు తెలంగాణ హైకోర్టులో లంచ్ మోష‌న్ పిటిష‌న్ వేసారు. తనకి పోలీసులు జారీ చేసిన నోటీసుని సవాలు చేసారు. తన ఇంటి వద్ద పోలీస్ పికెట్ ఏర్పాటు చేయాలని ఆదేశాలు ఇవ్వాలని కోరారు. తాను సెక్యూరిటీ కోరినా భద్రత కల్పించలేదని, వెంటనే తనకు భద్రత కల్పించాలని పిటిషన్ వేసారు. మోహన్ బాబు తరఫున సీనియర్ న్యాయవాదులు నగేష్ రెడ్డి, మురళీ మనోహర్ పిటిష‌న్ దాఖ‌లు చేసారు. ప్ర‌స్తుతం మోహ‌న్ బాబు ఓ ప్రైవేట్ హాస్పిట‌ల్‌లో చికిత్స పొందుతున్నారు. కొన్ని రోజులుగా మంచు ఇంట్లో ఆస్తుల వివాదం న‌డుస్తోంది. నాలుగు గోడ‌ల మ‌ధ్య జ‌ర‌గాల్సిన చ‌ర్చ కాస్తా రోడ్డు మీద‌కు వ‌చ్చింది. దాంతో మీడియా వ‌ర్గాల‌న్నీ జ‌ల్‌ప‌ల్లిలోని మోహ‌న్ బాబు నివాసం వ‌ద్దే ఉన్నాయి. మోహ‌న్ బాబుని చూసిన జర్న‌లిస్టులు ప్ర‌శ్న‌లు వేస్తుంటే మైకు లాక్కుని దాడి చేసారు. ఇద్ద‌రు ముగ్గురు జ‌ర్న‌లిస్టుల‌కు గాయాల‌య్యాయి. దాంతో ఆయ‌న‌పై జర్న‌లిస్టుల సంఘం కేసు వేసింది.